مْهَرِّبْ حَشِيشِه.. وْقَافْ يَا مَجْنُونْ
وِانْحِنِيلُو بْكلّ طَاعَه وْإِفْتِخَارْ
جَبَّار.. مَا بِيخَافْ مِنْ قَانُونْ
وِالْمَالْ تَحْت مْخَدّتُو قِنْطَارْ
مْهَرِّبْ حَشِيشِه.. قَاتِلْ مْلايِينْ
بْمَسْحُوقْ مِتْل السَّمّ.. نِيَّالُو
فَاتِحْ مَطَارْ.. مْرَافَق الْحلْوِينْ
وِالصّدقْ وِالإِخْلاصْ رِسْمَالُو
زِلْمُو، يَا رَبِّي تْزِيدْ، بِالْمِيَّاتْ
بِيخَوّفُوا الطُّرْقَاتْ وِالسَّاحَاتْ
تَا يْوَزّعُوا اللّذِه عَ كِلّ النَّاسْ
أَطْفَالْ مِتْل الزَّهْر وِبْنَيَّاتْ
هَيْك الرّجَال تْكُونْ يَا رَبِّي
تَاجْرُوا وْرِبْحُوا بوَزْنَاتَكْ
وْإِنتْ لَوْ مَا تْكُونْ مِتْخَبِّي
كِنْت ظْهَرِتْ لِلنَّاسْ ضَرْبَاتَكْ
لَيْشْ قِلْلِي لَيْشْ يا دَيَّانْ
تْرَكْتُو يْقَتِّلْ بِالْبَشَرْ تا يْعِيشْ
عَ صُورْتَكْ إِنْتْ خِلِقِتْ إِِنْسانْ
حْمالْ سَيْفَكْ رَكِّعِ الزِّعْرانْ
عَمْ يِقِتْلُو الْأَطْفالْ بِالتِّحْشيشْ
