كتبتها بعمر 16 سنة
ـ1ـ
شُو هَالدِّنِي.. شُو هَالدِّنِي؟
تَا تْعِيشْ فِيهَا كْبِيرْ
صَعْب كْتِيرْ
وِالأَصْعَب مْنِ الْكِلّْ
إِنُّو تْضَلّْ
بِـ هَالدِّنِي عَايِشْ دَنِي!
ـ2ـ
ما عَادْ فِيك تْقُولْ: يَا قَلْبِي
رَحْ زَيّنَكْ بِالْحُبّْ
الْحُبّْ صَفَّى كِذْبْ
كِلُّو تْجَارَه وْمَنْفَقَه
وْأَلْف قِصَّه مْلَفَّقَه
يِعْنِي حَبِيبَكْ صَارْ مِتْل الْعَقِرْبِه!
ـ3ـ
الصاحب ما فيكْ تْأَمّنُو
لو حبّك وزَارَكْ
وْنَامْ بِدْيَارَكْ
لَيْحِطّْ عَيْنُو عَ الْمَرَا
وْيِعْمِلْ بِبَيْتَكْ مَجْزَرَه
وْبِالآخْرَه.. شُو الآخْرَه
رفيقك مَا فِيكْ تَخْوّنُو
ـ4ـ
انْ جِرَّبتْ تِعْمِلْ قِيمْتَكْ
مَعْ نَاسْ ما عِنْدُنْ إِبَا
وْدَمَّاتْ قَلْبَكْ تِسْكِبَا
بْحَيْث الْكَرَمْ مِنْ شِيمْتَكْ
لَمَّا شِي مَرَّه بْيِلْتِقُوكْ
بِيجَرّبُوا تَا يِخْنِقُوكْ
بَرْكِي بْيِمْحُوا جْمِيلْتَكْ!
**
