من مسرحية خلصت اللعبه
ـ1ـ
مَهْمَا الرِّيحْ تِصْفُر بِالْبَرِيِّه
وِتْزِتّ الْخَوْفْ عَ شْطُوطْ السَّهْرِيِّه
لَـ غَنِّي وْصِيحْ
بِـ وِجّ الرِّيحْ
وْإِسْهَرْ وِاللَّيْل سِهْرَان بْعيِنَيِّي
ـ2ـ
مَهْمَا الْحُبّ يغْمُرْنِي بْرِيشَاتُو
وْيِكْتبْنِي حَرْف عَ صَفْحِةْ حَيَاتُو
مَا بِشْبَعْ حُبّْ
لَوْ دَاب الْقَلْبْ
وْقَالُوا: مِسْكِينْ شُو حلْوِه صِفَاتُو
ـ3ـ
مَا بِرْضَى كُون أُسْطُورَه وْرِوَايِه
وْيِحْكُونِي النَّاسْ لِوْلادُن حِكَايِه
أَنَا بَدِّي صِيرْ
نَغْمِةْ عَصَافِيرْ
تا تْبَشِّرْ النَّاسْ بِالْعِيدْ اللِّي جَايِي
**
